အိန္ဒိံယနိုင်ငံရဲ့ လင်းလတ်နေတဲ့ ကြယ်တစ်ပွင့်

အပ္ပမာဒ မဂ္ဂဇင်းနှင့် ကုသိနာရုံဆရာတော်ကြီးတွေ့ဆုံခြင်း

ကမ္ဘာ့သာသနာပြု ကုသိနာရုံမြန်မာကျောင်းဆရာတော် ဘဒ္ဒန္တဥာဏိဿရ (အဂ္ဂမဟာပဏ္ဍိတ၊ အဂ္ဂမဟာသဒ္ဓမ္မဇောတိကဓဇ) အမိမြန်မာနိုင်ငံတော်ကို ခေတ္တအပြန်တွင် အပ္ပမာဒမဂ္ဂဇင်းနှင့် ဆရာတော်တို့ တွေ့ဆုံခြင်းကိုတင်ပြလိုက်ပါသည်။

အပ္ပမာဒ။          တပည့်တော်အနေနဲ့ ဦးစွာပထမ ဆရာတော်ကြီးရဲ့ ထေရုပ္ပတ္တိအကျဉ်းကို သိလိုပါတယ်ဘုရား။

ဆရာတော်။             ဆရာတော်ကို ရခိုင်ပြည်နယ်၊ စစ်တွေခရိုင်၊ မင်းပြားမြို့နယ်၊ ငါးဇင်ရိုင်းကျွန်း၊ ဇီးပင်ကြီးရွာမှာ အဘဦးမောင်ကျော်သူ၊ အမိဒေါ်ဝင်းမြဦးတို့က ကောဇာသက္ကရာဇ် ၁၂၉၈ ခုနှစ်၊ တန်ဆောင်းမုန်းလပြည့်ကျော်(၁၃၊ ၁၁၊ ၁၉၃၆) အင်္ဂါနေ့မှာမွေးဖွားခဲ့ပါတယ်။ ငယ်နာမည် မောင်အောင်ဇံဝေဖြစ်ပါတယ်။ ၁၄ နှစ်သားအရွယ်မှာ ဇီးပင်ကြီးဆရာတော် ဦးစန္ဒောဘာသကို ဥပဇ္ဈာယ်ပြုပြီး ရှင်သာမဏေပြုခဲ့ပါတယ်၊ ဘွဲ့ကတော့ ရှင်ဥာဏဿရဖြစ်ပါတယ်။ အဲဒီနောက် ဇီးပင်ကြီးရွာက စစ်တွေရောက်၊ စစ်တွေကတဆင့် ရန်ကုန်ကိုရောက်ခဲ့ပါတယ်။ ၁၃၁၈ ခုနှစ်၊ ကဆုန်လပြည့်ကျော် ၁၀ ရက်၊ တနင်္ဂနွေနေ့နံနက် ၈း ၃၅ နာရီမှာ ဇီးပင်ကြီးဆရာတော် ဦးစန္ဒောဘသကို ဥပဇ္ဈာယ်ပြုပြီး မြင့်မြတ်တဲ့ ရဟန်းဘ၀ကို ရောက်ခဲ့ပါတယ် ရန်ကုန်မြို့၊ သိမ်ဖြူလမ်း၊ မင်္ဂလာရာမပါဠိတက္ကသိုလ် ခဏ္ဍသိမ်တော်မှာ ရဟန်းဘ၀ရောက်ခဲ့တာပါ။ အဒီ မင်္ဂလာရာမပါဠိတက္ကသိုလ်မှာပဲ စာသင်စာချဘ၀နဲ့ ၁၃ နှစ်လုံးလုံးနေထိုင်ခဲ့ပါတယ်။

အပ္ပမာဒ။                                ဆရာတော် စာပေပရိယတ္တိ သင်ကြားပုံကိုလည်း သိချင်ပါသေးတယ်ဘုရား။

ဆရာတော်။                ဇီးပင်ကြီးကျောင်းဆရာတော်ထံမှာ ပရိယတ်အခြေခံများနှင့် ဗေဒင်ပညာ၊ ဆေးပညာများကိုလည်း သင်ကြားခဲ့ပါတယ်။ ရှင်သာမဏေဘ၀၊ ရဟန်းဘ၀နဲ့ ဇီးပင်ကြီးဆရာတော် ဦးစန္ဒောဘာသ၊ ဦးသုဇာတ၊ စစ်တွေမြို့ စစ်ကဲတော်မင်းကျောင်း ဆရာတော်ဦးနာဂ၀ံသ၊ ရန်ကုန်မြို့ သိမ်ဖြူလမ်း မင်္ဂလာရာမပါဠိတက္ကသိုလ်ဆရာတော်ကြီး ဦးကေသရာဘိဝံသ၊ တိုက်အုပ်ဆရာတော် ဦးရဌသာရ၊ ဦးက၀ိဓဇ၊ ဇီးကုန်းမြို့ အရှေ့သစ်နဖား ဆရာတော်ဦးဣန္ဒာစာရ စသည့်ဆရာတော်များထံမှာ ပထမပြန်စာပေများ သင်ကြားခဲ့ပါတယ်။ မန္တလေးမြို့မှာတော့ မစိုးရိမ်ဆရာတော်ကြီးနဲ့ အခြားသော ဆရာတော်ကြီးတွေထံမှာလည်း ပညာသင်ကြားခဲ့ပါတယ်။

အပ္ပမာဒ။                        ပရိယတ္တိစာပေများအပြင် လောကီစာပေများ သင်ကြားခဲ့ပုံကိုလည်း မိန့်ပါဦးဘုရား။

ဆရာတော်။                  လောကီပညာရပ်အနေနဲ့က ပေတာကုန်း ဆရာတော်ဦးနန္ဒရဲ့ အလွတ်ပညာသင်ကျောင်းမှာ သင်ကြားခဲ့ပါတယ်။  ၁၊ ၈၊ ၆၃ ခုနှစ်မှာတော့ အိန္ဒိယနိုင်ငံကိုရောက်ခဲ့ပါတယ်။ အဲဒီမှာ အိန္ဒိယဘာသာ အခြေခံမှစပြီး သက္ကတဘာသာ၊ အင်္ဂလိပ်ဘာသာ၊ တိဗက်ဘာသာများကို ဘွဲ့လွန်အထိ သင်ကြားခဲ့ပါတယ်။ တိဗက်ဘာသာရပ်မှာတော့ တက္ကသိုလ်တစ်ခုလုံးမှာ ပထမရခဲ့ပါတယ်။ တိဗက်ဘာသာဆရာအဖြစ် စာမေးပွဲကိုလည်း အောင်မြင်ခဲ့သေးတယ်။ ဂေါရခပူရ်တက္ကသိုလ်တွင် တိဗက်ဘာသာ ဆရာအဖြစ်ဝင်ရောက် စာမေးပွဲဖြေခဲ့ရာ အောင်မြင်ခဲ့ပါတယ်။ အင်တာဗျူးဘိုင်ဘာမှာလည်း အောင်မြင်ခဲ့ပါတယ်။ သို့သော ဆရာတော်ကို ဆရာအဖြစ် တက်ရောက်သင်ပြရန် အမေကခွင့်မပြုခဲ့ပါ။

အပ္ပမာဒ                      လောကီပညာရော၊ လောကုတ္တရာပညာရော ဆရာတော် အောင်မြင်ခဲ့တဲ့ စာမေးပွဲများကိုလည်း ပြောပြပါဦးဘုရား။

ဆရာတော်။                 မင်္ဂလာရာမကျောင်းတိုက်မှာပဲ သာမဏေဘ၀၊ သာမဏေ မူ၊ ငယ်၊ လတ်၊ ကြီးစာမေးပွဲများ၊ ရဟန်းဘ၀နဲ့ ၀ိနယာနုဂ္ဂဟစာမေးပွဲ၊ မူလတန်းနဲ့ ငယ်၊ လတ်၊ ကြီးတန်းတို့ကို အောင်မြင်ခဲ့ပါတယ်။ နောက်အစိုးရပထမပြန် စာမေးပွဲမှာလည်း ငယ်၊ လတ်၊ ကြီးများကိုအောင်မြင်ခဲ့ပါတယ်။ အိန္ဒိယရောက်ပြီး ပြည်နယ်ဘုတ်အဖွဲ့မှ ကျင်းပသော ၁၀ တန်းစာမေးပွဲ၊ ၁၉၆၈ ခုနှစ်၊ ဘုတ်အဖွဲ့မှကျင်းပသော ၁၂ တန်းစာမေးပွဲ ၁၉၇၀ ခုနှစ်၊ ၁၉၇၃ ခုနှစ်မှာ ဂေါရ်ခ်ပူရ်တက္ကသိုလ်က B.A ဘွဲ့၊ နောက်အဲဒီတက္ကသိုလ်မှာပဲ ၁၉၇၅ ခုနှစ်အရောက်တော့ M.A (သမိုင်း) ဘွဲ့ရတယ်။ ၇၈ မှာတော့ ရာဇ၀င်သမိုင်း M.A ပါဠိဘွဲ့တွေပါ ထပ်ပြီးအောင်မြင်ခဲ့ပါသေးတယ်။ ပြယာဂ်တက္ကသိုလ်မှာ ပါဠိဆာဟိတျရတနာဘွဲ့နဲ့ တိဗက်ဘာသာဒီပလိုမာ လက်မှတ်လည်းရခဲ့သေးတယ်။ ဂေါရ်ခ်ပူရ်တက္ကသိုလ်က ဥပဒေပညာ L.L.B ဘွဲ့ကိုလည်းရခဲ့ပါသေးတယ်။ ဘုန်းကြီးက အာယုဗ္ဗေဒ ခေါ်တဲ့အိန္ဒိယတိုင်းရင်းဆေးပညာကိုလည်းပဲ ပေါက်ရောက်အောင် သင်ယူပြီးတော့ ယူပီပြည်နယ်အစိုးရက ကျင်းပတဲ့ တိုင်းရင်းဆေးပညာ စာမေးပွဲကို ဖြေဆိုခဲ့ရာမှာ B.A.M.S တိုင်းရင်းဆရာဝန်ဘွဲ့ကို ရပါသေးတယ်။

အပ္ပမာဒ။                            ဒါဆို ဆရာတော်ကြီးက အိန္ဒိယကိုရောက်မှ ပညာတွေ အတော်စုံအောင် သင်လိုက်သေးတာကိုးဘုရား၊ စောစောက ဆရာတော်မိန့်တဲ့ ၆၃ ခုနှစ် အိန္ဒိယပြည်ရောက်တဲ့အခါ ဆရာတော် သာသနာရေးနဲ့ ပတ်သက်လို့ လှုပ်ရှားခဲ့ရပုံကိုလည်း ပြောပြပါဦးဘုရား။

ဆရာတော်။           ၆၃ ခုနှစ်မှာ ကုသိနာရုံဆရာတော်ကြီးနဲ့ မိဂဓါဝုန်ဆရာတော် ဦးကိတ္တိမတို့ ဖိတ်ခေါ်လို့ သြဂုတ်လမှာ အိန္ဒိယပြည် ကုသိနာရုံကိုဘုန်းကြီးရောက်ခဲ့ပါတယ်။ ဟိုရောက်တော့ ကျောင်းတိုက်အုပ်ချုပ်ရေး၊ ၀တ္တကမြေ ထိမ်းသိမ်ရေး၊ ဆရာတော်ကြီးကိုစောင့်ရှောက်ရမှု၊ တစ်ဖက်ကလည်း ပညာရေးဖက် လိုက်စားမှုတွေကို လုပ်ရတဲ့အပြင် ကျောင်းရဲ့ပညာရေးတာဝန် အသီးသီးတို့ကိုလည်း မနားတမ်းအပြည့်အ၀ တာဝန်ယူခဲ့ပါတယ်။ နောက်ပြီး နိုင်ငံခြားသားလက်ထဲရောက်နေတဲ့ ၀တ္တကမြေများကို ပြန်လည်ရရှိအောင် ကြိုးစားခဲ့ပါတယ်။ ဒါ့အပြင် ကုသိတာရုံ မဟာပရိနိဗ္ဗာနတစ်ခုလုံးကို အုပ်ချုပ်နေတဲ့ ကုသိနာရုံဘိက္ခုသံဃအဖွဲ့ မှာ အတွင်းရေးမှူး၊ ဗုဒ္ဓဂယာဘုရားကြီး ထိမ်းသိမ်းရေးကောင်မတီမှာ ဗုဒ္ဓဘာသာဝင်လေးဦးအနက် တစ်ပါးအပါအ၀င်ဖြစ်တဲ့အခါကျတော့ ဘုန်းကြီးက ၀င်ကြေးပေးပြီးမှ ၀င်ရတဲ့စနစ်ကို ပယ်ဖျက်နိုင်ခဲ့ပါတယ်။

အပ္ပမာဒ။             ဆရာတော်မနားမနေ အလုပ်လုပ်ခဲ့တာတွေကြားရတော့ တပည့်တော်ဖြင့် သာသနာတော်အတွက် အားရလှပါတယ်ဘုရား၊ အဒီမှာ ဆရာတော်တို့ကြိုးပမ်းခဲ့တဲ့ ပညာရေးစနစ်ကိုလည်း အကျဉ်းလောက်မိန့်ပါဦးဘုရား။

ဆရာတော်။                      ၁၉၇၂ ခုနှစ်မှာ ဆရာတော်ကြီး ဦးစန္ဒြမဏိ ပျံလွန်တောမူခဲ့ပါတယ်၊ ဘုန်းကြီးနဲ့ မိဂဒါဝုန်ဆရာတော် ဦးကိတ္တိမတို့ ဒွိသန္တကလို့ခေါ်တဲ့ နှစ်ပါးပိုင်ကျောင်းအဖြစ် ကျန်ရစ်တယ်။ ဆရာတော်ဦးကိတ္တိမက ဘုန်းကြီးကို ၁၉၈၇ ခုနှစ်၊ ဧပြီလ ၂၀ ရက်နေ့မှာ ကုသိနာရုံကျောင်းမှ ထက်ဝက်သူပိုင်၊ မိဂဒါဝုန်တစ်ခုလုံး၊ ဆီဂရာဆာဦးသွင်တစ်ခုလုံးကျတော့ စာချုပ်စာတမ်းနဲ့ အပြီးလွဲခဲ့တယ်။ ဒီတော့ဆရာတော်ကြီး ရှိစဉ်တည်ထောင်ခဲ့တဲ့ စာသင်ကျောင်း မူလတန်းကျောင်း ငါးကျောင်း၊ အလယ်တန်းကျောင်း သုံးကျောင်း၊ အထက်တန်းအင်တာကောလိပ် ငါးကျောင်း၊ ဘွဲ့လွန်ဒီဂရီကောလိပ်ကျောင်း တစ်ကျောင်းကိုအုပ်ချုပ်ခဲ့ရတယ်။

အပ္ပမာဒ။                    ကုသိနာရုံမှာ ဆရာတော်ဆောင်ရွက်ခဲ့ရတဲ့ တာဝန်ပိုင်းများကိုလည်း သိလိုပါတယ်ဘုရား။

ဆရာတော်။                       ရှေးဟောင်းသုတေသနနဲ့ပတ်သတ်တဲ့နေရာတွေ ရှိပါတယ်။ အဲဒါတွေကတော့ ဗုဒ္ဓဂယာ၊ ရာဇဂြိုဟ်၊ နာလန္ဒာ၊ မိဂဒါဝုန်၊ သာဝတ္ထိနဲ့ သင်္ကဿဌာနများကိုတော့ ရှေးဟောင်းသုတေသနဌာန များကအုပ်ချုပ်ပါတယ်။ ဆရာတော်အနေနဲ့တော့ ဆရာတော်ကြီးရှိစဉ်ကကဲ့သို့ပဲ ကုသိနာရုံမှာရှိတဲ့ ရှေးဟောင်းဌာနကို တရားအမျိုးမျိုးရင်ဆိုင်ပြီး အောင်မြင်မှုရရှိခဲ့ပါတယ်။ ကုသိနာရုံ မဟာပရိနိဗ္ဗနဌာနတစ်ခုလုံး ကိုသတ္တိရှိရှိနဲ့ ထိန်းသိမ်းစောင့်ရှောက်ထားပါတယ်။ တိုင်းတစ်ပါး သူများတကာ မလုပ်နိုင်တဲ့အလုပ်ကို ဘုန်းကြီးက လုပ်ဆောင်ပြီး သာသနာပြုနေတာပါ၊ သာသနာတော်အတွက်ဆို အသက်ပေးဆောင်ရွက်ဖို့ ၀န်မလေးပါဘူး၊ ဒါကြောင့်လည်း အိန္ဒိယသားများနဲ့ အိန္ဒိယအစိုးရကပါ သဘောတူပြီး အားပေးခဲ့ပါတယ်။ ဆက်လက်ပြီးတော့ သာသနာ့အဆော်အဦးများ တည်ဆောက်ခြင်း၊ သာသနာပြုပွဲများ ကျင်းပခြင်း၊ ပညာရေးကိစ္စများကိုလည်း ဆောင်ရွက်သွားပါမယ်။

ဆက်လက်ပါအုံးမည်...........